രഥചക്രം

മമത;

തൊട്ടു തീണ്ടാത്തൊരാ ജന്മമെന്നു

ചൊല്ലിച്ച ബാല്യത്തിൻ ചൂടിൽ

ചൊല്ലിയറിയിക്കാതെയാ-

യിത്തിരി നന്മയെ 

കാരണമറിയാക്കാരണത്തിൻ പേരിൽ

കൂടെ കൂട്ടിയോരെൻ മനം!

അത്രമേൽ പ്രിയമെന്നാഞ്ഞു ചൊല്ലിയാ-

ളൊഴിഞ്ഞാമനതാരിൽ,

പ്രതിഷ്ഠിച്ചൊരാ വിഗ്രഹം.

മങ്ങിയും തെളിഞ്ഞുമാ കാലവും

ഇഴഞ്ഞും നിരങ്ങിയുമാ രഥചക്രവും.

ഉത്തരമില്ലാതിരിക്കെന്ന പ്രഹസനത്തിൻ മറവിലാ-

സ്നേഹ ചന്ദനം ഇരുന്നുണങ്ങി!

അന്തിത്തിരി തെളിയാതെയാകോവിലിൽ

ശോഭിച്ചാപൊടിപിടിച്ചെൻ വിഗ്രഹം!

***********

തന്നോളമെത്തിയാകർമ്മ ഭാണ്ഡവും പേറി

ഉഴറുമാ നേരം 

തിക്കിതിരക്കിയാതെരുവിനോളത്തിൽ

നിൻ നന്മ തിന്മയെന്നു ശ്രവിച്ചാകാതുകൾ.

പ്രകമ്പനം പൂണ്ടൊരാ മനമന്നറിഞ്ഞു

ഇത്തിരി നോവിൻ പിടിവാശികൾ !

പിടിവിടില്ലൊരിക്കലും;

മുറുകെ പിടിക്കുമാ-

കരങ്ങളെന്നോതി തളിച്ചൂ പുണ്യാഹം.

അരമണി അഴിച്ചു പാർത്തൂ

വിറയാർന്നു തുള്ളിയൊരെന്നിലെ കോമരം

***********

നിനച്ചിരിക്കാതൊരു വേളയിൽ

തെളിഞ്ഞു മിഴികളിലാരൂപം,

 പിടി തരാതെ മറഞ്ഞു പോയതും ക്ഷണം കൊണ്ട് .

ഭാരമതേറുന്നു മുതുകിൽ, നിറയുന്നു കുഞ്ഞുത്തരവാദിത്തത്തിൻ ഉടുപ്പുകളാഭാണ്ഡത്തിൽ.

പറയാതെ, 

കാത്തു നിൽക്കാതെ,

ആ രഥചക്രമകന്നു നീങ്ങി.

പതിവിനു വിപരീതമായ് തിരക്കൊഴിഞ്ഞാ നാഴിക വിനാഴികൾ കാഴ്ചവച്ചാനാഥൻ;

തെളിഞ്ഞാകോവിലിൻ മുറ്റത്തെ കൽദീപങ്ങൾ.

ചന്ദനത്തിൻ കാന്തിയിൽ ശോഭിച്ചാ വിഗ്രഹങ്ങൾ.

ജപിച്ചൊരു മന്ത്രനൂലിൽ കെട്ടിയാടി മനങ്ങൾ വീണ്ടും.

 ഉരുളുന്നു രഥചക്രം പിന്നെയുമാതുടർക്കഥയറിയാതെ......

Nimensh. N, Assistant Professor of Mathematics, Al Shifa College of Arts and Science, Kizhattoor, Perinthalmanna