ഇനി എത്ര ദൂരം

 

കിരീടം വെക്കാത്ത രാജകുമാരനുവേണ്ടി

ചില മനുഷ്യരെ മനസ്സിലാക്കാൻ അവരുടെ ട്രോഫികൾ നോക്കിയാൽ മതിയാകില്ല. വീണിട്ടും എഴുന്നേറ്റ നിമിഷങ്ങൾ കൂടി കാണണം.

കൈവിട്ടുപോകാമായിരുന്ന സ്വപ്നങ്ങളെ അവർ എത്ര മുറുകെ പിടിച്ചിരുന്നുവെന്ന് അറിയണം. അപ്പോഴാണ് ഒരു മനുഷ്യന്റെ ഉയരം അളക്കാൻ കഴിയുക.

ഫുട്ബോൾ വിചിത്രമായ ഒരു കളിയാണ്. തൊണ്ണൂറ് മിനിറ്റിനുള്ളിൽ ജീവിതം മുഴുവൻ അതിൽ ഒതുങ്ങും. അതിൽ പ്രതീക്ഷയുണ്ട്,

നിരാശയുണ്ട്.അവസാന നിമിഷം വരെ തോൽവി വിജയമായി മാറാം.

വിജയം തോൽവിയായും.പക്ഷേ മത്സരം അവസാനിച്ച ശേഷം പോലും അവസാനിക്കാത്ത ചില യാത്രകളുണ്ട്.

അവയിൽ ഒന്നാണ് ക്രിസ്റ്റ്യാനോ റൊണാൾഡോയുടേത്.

ലോകഫുട്ബോളിന്റെ ചരിത്രത്തിൽ സ്വന്തം അധ്വാനവും അചഞ്ചലമായ ആത്മവിശ്വാസവും കൊണ്ട് ഇതിഹാസമായി മാറിയ പേരാണ് ക്രിസ്റ്റ്യാനോ റൊണാൾഡോ. പോർച്ചുഗലിലെ മഡെയ്റ ദ്വീപിലെ ഒരു സാധാരണ കുടുംബത്തിൽ ജനിച്ച അദ്ദേഹം, ദാരിദ്ര്യവും ജീവിതപ്രതിസന്ധികളും മറികടന്ന് ലോകത്തിലെ ഏറ്റവും മികച്ച ഫുട്ബോൾ താരങ്ങളിൽ ഒരാളായി ഉയർന്നു. അസാധാരണമായ കഴിവിനേക്കാൾ അദ്ദേഹത്തെ വേറിട്ടുനിർത്തുന്നത് കഠിനാധ്വാനവും അച്ചടക്കവും ഒരിക്കലും തോൽവി സമ്മതിക്കാത്ത മനോഭാവവുമാണ്. ഓരോ മത്സരവും സ്വയം തെളിയിക്കാനുള്ള അവസരമായി കണ്ട റൊണാൾഡോ,

പന്ത്രണ്ടാം വയസ്സിൽ സ്വന്തം വീടും കുടുംബവും വിട്ട് സ്പോർട്ടിങ് ലിസ്ബണിന്റെ അക്കാദമിയിലേക്ക് പോയപ്പോൾ, അവൻ ഒരു ക്ലബ്ബിൽ ചേർന്നതല്ല. സ്വന്തം ജീവിതവുമായി ഒരു കരാർ ഒപ്പിടുകയായിരുന്നു. പിന്നീട് ലോകം കണ്ടത് റെക്കോർഡുകളാണ്…ഗോളുകളാണ്….ആഘോഷങ്ങളാണ്.

റൊണാൾഡോയുടെ ചരിത്രം ട്രോഫികളുടെയും റെക്കോർഡുകളുടെയും മാത്രം കഥയല്ല. ദാരിദ്ര്യത്തെയും വിമർശനങ്ങളെയും വെല്ലുവിളികളെയും അതിജീവിച്ച് അച്ചടക്കവും കഠിനാധ്വാനവും ആത്മവിശ്വാസവും കൊണ്ട് ലോകത്തിന്റെ നെറുകയിലെത്തിയ ഒരു മനുഷ്യന്റെ വിജയഗാഥ കൂടിയാണ് അത്.

ജീവിതം ചിലപ്പോൾ ഒരു വിചിത്രമായ കണക്ക് സൂക്ഷിക്കും.പലതും നൽകും,ഒരു കാര്യം മാത്രം മാറ്റിവെക്കും.

റൊണാൾഡോയുടെ ജീവിതത്തിൽ ആ പൂർത്തിയാകാത്ത വരിയുടെ പേരായിരുന്നു ലോകകപ്പ്. അദ്ദേഹം ആ സ്വപ്നത്തെ പലവട്ടം പിന്തുടർന്നു.

ഓരോ തവണയും അവസാന വിസിൽ മുഴങ്ങുമ്പോൾ, സ്വപ്നം കുറച്ചുകൂടി അകന്നു.വിജയം കിരീടം കൊണ്ടു മാത്രം അളക്കാൻ പറ്റില്ല.

ഒരു തലമുറയെ സ്വപ്നം കാണാൻ പഠിപ്പിക്കാൻ കഴിഞ്ഞാൽ, അതും വിജയമാണ്.

ഒരു കുഞ്ഞ് ആദ്യമായി പന്ത് കാലിൽ വെക്കുമ്പോൾ ആരെയെങ്കിലും പോലെ ആവാൻ  ആഗ്രഹിക്കുന്നുണ്ടെങ്കിൽ അതും വിജയമാണ്.

പരാജയത്തിന് ശേഷം വീണ്ടും എഴുന്നേൽക്കാൻ ഒരാളുടെ ജീവിതം ധൈര്യം നൽകുന്നുണ്ടെങ്കിൽ, അതാണ് ഏറ്റവും വലിയ വിജയം.കാലം കടന്നുപോകും പുതിയ താരങ്ങൾ വരും പുതിയ റെക്കോർഡുകൾ പിറക്കും പുതിയ കിരീടങ്ങൾ ഉയരും. പക്ഷേ ചില പേരുകൾ കാലത്തോടൊപ്പം മങ്ങില്ല. കാരണം അവർ കളിച്ച മത്സരം ഫുട്ബോളിൽ മാത്രമായിരുന്നില്ല.

മനുഷ്യരുടെ മനസ്സിലുമായിരുന്നു.അവിടെ അവർ ഇന്നും ജയിച്ചുകൊണ്ടിരിക്കുന്നു.

ലോകകപ്പ് അദ്ദേഹത്തിന്റെ കൈകളിലെത്തിയില്ല.പക്ഷേ ലോകം അദ്ദേഹത്തെ കൈകളിലെടുത്തു.

ചില മനുഷ്യർക്ക് കിരീടം തലയിൽ വയ്ക്കാൻ കഴിയില്ല.കാരണം അവർ അത് അതിനുമുമ്പേ മനുഷ്യരുടെ ഹൃദയങ്ങളിൽ ചൂടിക്കഴിഞ്ഞിട്ടുണ്ടാകും.

ഈ കുറിപ്പ് ഒരു ലോകചാമ്പ്യനുവേണ്ടിയല്ല.ഒരിക്കലും കൈവിടരുത് എന്ന് തന്റെ ജീവിതം കൊണ്ട് പഠിപ്പിച്ച ഒരു മനുഷ്യനുവേണ്ടിയാണ്. ഫുട്ബോളിനെ ഒരു കളിയിൽ നിന്ന് ഒരു വികാരമാക്കി മാറ്റിയ ഒരാൾക്കുവേണ്ടിയാണ്.

ഒരു ലോകകപ്പ് കിരീടം നിങ്ങളുടെ കൈകളിലെത്തിയില്ലായിരിക്കാം. പക്ഷേ നിങ്ങളുടെ "Siuuu..." ഇന്നും ലോകമെമ്പാടുമുള്ള കുഞ്ഞുമനസ്സുകളിൽ മുഴങ്ങിക്കൊണ്ടിരിക്കുന്നു. ഒരു ഗോൾ പിറക്കുമ്പോൾ ആ വിളി ആവർത്തിക്കാതെ കളി പൂർത്തിയാകാത്ത കുട്ടികൾ അനേകരുണ്ട്. അത്രമേൽ ആഴത്തിൽ അത് ഒരു തലമുറയുടെ ഓർമ്മയിൽ പതിഞ്ഞിരിക്കുന്നു.  ചില ശബ്ദങ്ങൾ സ്റ്റേഡിയങ്ങളിൽ മാത്രമല്ല ചരിത്രത്തിലും മുഴങ്ങും.

Shameena P.

Assistant Professor of Computer Science, 

Al Shifa College of Arts and Science, Keezhattur, Perinthalmanna.